Rěčne projekty
Dobra nalada a čiłe žiwjenje knježitej w Chróšćanskej wjacezaměrowej hali „Jednota“, hdyž so tam dźěći a starši ke kóždolětnemu swójbnemu popołdnju zetkawaja. Přeprošujemy na tute zarjadowanje zhromadnje ze župu „Michał Hórnik“.
„Knihi su zastupny lisćik do raja fantazije“, tak rěka přeprošenje na čitanske wubědźowanje za serbskich a serbšćinu wuknjacych šulerjow 3. lětnika. Tute wotměwa so lětnje w Budyskej Smolerjec kniharni.
Ferialny kurs serbšćiny za dźěći, kotrež zwonka serbskeho sydlenskeho ruma wotrostu
Wuknjacym 2. do 5. lětnika, kotřiž nimaja móžnosć so na wučbje serbšćiny wobdźělić, poskićamy w jutrownych prózdninach ferialny kurs serbšćiny.
Piknik ma swójby a generacije składnostnje Mjezynarodneho dnja swójby hromadźe zwjesć. Wšitcy njech so witani čuja a wotputanu a zabawnu zhromadnosć wužija.
Kóždej dwě lěće wotměwaja so dny serbskeho dźěćaceho dźiwadła. W srjedźišću dnjow steja dźěłarnički pod nawodom serbskich dźiwadźelnikow a režiserow. Na kóncu prezentuja młodźi hrajerjo swoje kmanosće – ze swojeho repertoira abo z dźěłarničkow. Tute zarjadowanje přewjedźemy zhromadnje ze Załožbu za serbski lud a Němsko-Serbskim ludowym dźiwadłom.
Cyły wječor wotkrywaja sej serbske šulerki a serbscy šulerjo Budyske stare město a zhonja při tym tójšto zajimaweho wo jeho wěžach. W historiskim ambienće prezentuja sej mjez sobu swoje najlubše serbske knihi a z nich předčitaja.
„W kraju wjesołych dźěći“ – pod tutym hesłom a pod našim nawodom wuhotuja sobotu popołdnju dźěćace skupiny ze šulow a towarstwow pisany kulturny program na Krawčikec statoku w Chrósćicach.
Tradicionalnje přeprošujemy wšitkich šulerjow a wšitke šulerki štwórteho lětnika, kotřiž serbšćinu jako cuzu rěč wuknu, w septembru na zhromadne dopołdnjo do Radworja. Dźěći móža so na wšelakich stacijach – kaž serbske spěwy, reje, literatura, kolesowarski parcours, wjesna rallye – wuspytać. Je to dobra składnosć za nich, serbšćinu słyšeć a rěčeć. Wučerki a wučerjo sej mjeztym informacije a nazhonjenja wuměnja.
Šulerki a šulerjo mjez 10 a 18 lětami su kóžde druhe lěto na comicowe wubědźowanje přeprošeni. Woni maja swojim samo rysowanym stawiznam serbske teksty přidać. Za jury njeje lochko, dobyćerja resp. dobyćerku wubědźowanja zwěsćić.
Comicowa dźěłarnička z grafikarjom Stefanom Hanušom wotměwa so kóždolětnje kónc septembra. Šulerjo nawuknu, we wobrazowej stawiznje wuměłstwo a rěč zwjazać a pod serbskim nawodom w małych kročelach swójski comic nastać dać.
Zo bychu so dalše serbske rěčne rumy wutworili, słuži časopis Płomjo tež jako akciski medij. Tak iniciěrujemy swójske wubědźowanja a zarjadowanja za dźěći, kaž warjenski kurs w serbskim hosćencu „Wjelbik“.
Kóždolětnje třeći pjatk w nowembru wotměwa so cyłozwjazkowy předčitanski dźeń (www.vorlesetag.de). Koordinujemy předčitarki a předčitarjow za kubłanišća ze serbskim poskitkom, předčitamy tež sami z našich najlubšich knihow a posrědkujemy tak zahoritosć za čitanje.
Poskitk materialijow za dźěći, staršich, kubłarki a kubłarjow
Nowowudata brošurka skići přehlad aktualnych materialijow za dźěło we Witaj-skupinach – wuwiwane pak pola nas w Rěčnym centrumje WITAJ pak wot našich partnerow. Hač kolenowe knižki, dźěłowe mapy, knihi, zešiwki abo hry – wšitke su pisane ilustrowane a přeprošuja do zaběry.