WITAJ – w centrumje za serbsku rěč

Žiwa rěč je wuraz žiweje kultury – a kusk doma. Wona twori identitu a začuće zhromadnosće. Tohodla wobhladujemy jako naš nadawk, serbsku rěč zdźeržeć a na přichodnu generaciju dale dać. Chcemy ju spěchować a w modernym swěće dale wuwiwać. Za to trjebamy tež Was, lubi starši, dźědojo a wowki, pedagogojo w pěstowarnjach a šulach a spěchowarjow serbskeje kultury.

Štó je Rěčny centrum WITAJ?

Z WITAJ! witamy kóždeho w Hornjej a Delnjej Łužicy, kiž chce serbsce rěčeć. My sobudźěłaćerki a sobudźěłaćerjo Rěčneho centruma WITAJ mamy přihódne poskitki za najmjeńšich w pěstowarnjach, za šulerjow a dorosćenych. My wuwiwamy serbskorěčne wučbne materialije, wudawamy časopisy a přewodźamy dwurěčne kubłanje na zakładźe wědomostnych dopóznaćow. Z našimi projektami a našim młodźinskim dźěłom podpěrujemy ludźi tu pola nas.

Čehodla dźensa serbsce wuknyć?

  • „… dokelž chcu serbsku rěč jako kulturne kubło zdźeržeć.“
  • „… dokelž wotewrja rěčne znajomosće durje do druhich swětow a kulturow.“
  • „… dokelž spěchuje wuknjenje rěčow duchowne zamóžnosće – w młodej kaž we wysokej starobje.“
  • „… dokelž móža mi serbskorěčne kmanosće w powołanju wužitne być.“
  • „… dokelž móže moje dźěćo w pěstowarni hrajkajo druhu rěč nawuknyć – bjez toho zo mam přidatnje prócu nałožować.“

Rěčny centrum WITAJ bu 2001 jako samostatny wotrjad Domowiny – Zwjazka Łužiskich Serbow z. t. załoženy. Swoje sydło ma w Budyšinje a Choćebuzu. Wón spěchuje so přez Załožbu za serbski lud, kotraž dóstawa přiražki Zwjazka, Swobodneho stata Sakskeje a Kraja Braniborskeje.