Serbskorěčne kubłanje w dźěćacych dnjowych přebywanišćach

Druhu rěč wuknu najwjace dźěći w Sakskej hakle w zakładnej šuli. Hinak je to tu pola nas w Hornjej Łužicy. Tu wotrostu dźěći wot małosće sem z dwěmaj rěčomaj: ze serbšćinu a němčinu.

Wosebje na wsach rěča dźensa hišće mnozy ludźo serbsce. Za nawuknjenje serbšćiny jako druhu rěč knježa tu pola nas potajkim idealne wuměnjenja. A čim prjedy so z druhej rěču započina, ćim lóšo so wuknje. Tuž doporučimy, hižo w pěstowarni z tym započinać.

Nam leži na wutrobje, dwurěčne kubłanje w dźěćacych dnjowych přebywanišćach podpěrać a spěchować, mjez druhim z

  • projektami za dźěći a jich swójby,
  • didaktiskimi materialijemi,
  • dalekubłanjemi za kubłarki,
  • přednoškami a informaciskimi zarjadowanjemi k serbskorěčnemu kubłanju w dźěćacych dnjowych přebywanišćach.

Serbsce wuknyć bjez stresa z wokablemi

Najwjace z dźěćacych dnjowych přebywanišćow posrědkuje dźěćom serbskorěčne znajomosće po modelu Witaj. Tutón bazuje na metodźe imersije, kotraž wusměri so na princip „jedna wosoba – jedna rěč“: Serbske maćernorěčne kubłarki rěča z dźěćimi, kiž pochadźeja zwjetša z němskorěčnych swójbow, po zdaću samozrozumliwje serbsce – bjez toho, zo do němčiny přełožuja. Při tym postupuja łahodnje, zo bychu je tež wšitke dźěći zrozumili. Woni wola swoje słowa wědomje a wospjetuja je husćišo. Nimo toho zesylnjeja swoje wuprajenja z gestami, mimiku a hłosom. Tak dadźa dźěćom wažnu zepěru, sej na cyle přirodne wašnje jim cuzu rěč wotkryć.

Metoda imersije je najpřirodniše wašnje, kak sej dźěći druhu rěč přiswoja. Wona je so po wšěm swěće jako najintensiwniša forma sposrědkowanja rěče wopokazała. Wona wuńdźe z toho, zo dźěći ze sebje wuknu, sej swět wotkryja a zapřimnu. Woni rozklučuja woznam słowow ze wšěmi zmysłami cyle same wot so, zašćěpja sej zynk a strukturu rěče a napodobnja ju.

Model Witaj poskićuje so w Hornjej Łužicy w dźěćacych dnjowych přebywanišćach, pak w jednotliwych skupinach abo w cyłym kubłanišću kaž tež w dnjowym hladanju dźěći a w horće.

Chceće-li wjace wo tutej wuknjenskej metodźe zhonić, wobhladajće sej naš film a čitajće naše brošurki we wobłuku download. Dalšu literaturu k serbskorěčnemu kubłanju namakaće tohorunja we wobłuku download.

Zakonski pozadk

Serbskorěčne kubłanje w dźěćacych dnjowych přebywanišćach a specifiske spěchowanja su zakonsce zakótwjene

  • w paragrafomaj 2 a 20 Zakonja wo dźěćacych dnjowych přebywanišćach (SächsKitaG wot 15.05.2009)
  • w Postajenju wo dźěćacych dnjowych přebywanišćach w serbskim sydlenskim rumje Sakskeje (SächsSorbKitaVO wot 19.09.2006)