Za posrědkowanje a spěchowanje serbšćiny w dźěćacych dnjowych přebywanišćach buchu w zamołwitosći Jadwigi Kaulfürstoweje kwalitatiwne standardy nadźěłane. Jedna so wo detailěrowanu přiručku za kubłarki a kubłarjow, nawodnicy a nošerjow. Z tutym katalogom móža woni zaměrnje kwalitu swojeho rěčnopedagogiskeho dźěła z dźěćimi hač do 6 lět dalewuwiwać a zawěsćić.
Zakładnu ideju k tomu tworješe narodny katalog kriterijow „Pädagogische Qualität in Tageseinrichtungen für Kinder“, wudaty wot Wolfganga Tietzeho a Susanne Viernickel. W katalogu kwalitatiwnych kriterijow wopisuje so dokładnje optimalna rěčnopedagogiska praksa po metodźe imersije, kotraž měła kubłarkam nastork być, kwalitu swojeho dźěła při posrědkowanju a spěchowanju rěče dale zwyšić.

Dobry dźěłowy material za kubłarjow. Wužiwajće jón.
Nastał je wobšěrny katalog kwalitatiwnych kriterijow za dźěło kubłarjow w žłobiku a pěstowarni. Jemu budźe dźěłowy zešiwk z metodiskimi doporučenjemi k nałožowanju w praksy kaž tež z formularami k sebjeewaluaciji slědować.

⇒ k downloadej …

Rěčny centrum dźěła tuchwilu na certificěrowanju serbskorěčnych kmanosćow. Zaměr je wuwiwanje pruwowanskich materialijow, z kotrymiž so znajomosće serbšćiny hódnoća a wobkruća, wotpowědnje mjezynarodnje připóznatej kompetencnej skali GER (Zhromadny europski referencny ramik za rěče). Nadźěłanje leži w zamołwitosći Manuele Smolineje (za hornjoserbšćinu) a dr. Madleny Norbergoweje (za delnjoserbšćinu). Wona bazuje na dotal předležacych materialijach k hornjo- a delnjoserbskemu rěčnemu kubłanju dorosćenych a na aktualnych nazhonjenjach z rěčnych kursow Rěčneho centruma WITAJ. Wotpowědne mustrowe pruwowanja, wuhódnoćenske formulary a nawody k pruwowanjam nastanu w kooperaciji ze Serbskim institutom z. t. a Institutom za sorabistiku Lipšćanskeje uniwersity. Na kóncu budźe za kóždeho móžno, swoje znajomosće hornjo- resp. delnjoserbšćiny z pomocu standardizowanych pruwowanjow certifikować dać.

⇒ k rěčnemu certifikatej …