Serbske doma

Mjeztym zo mamy zakładne šule hišće w dosahacej měrje w bliskosći bydlenskich městnow, dawaja serbske gymnazije jenož w měšćanskich centrach Choćebuz a Budyšin. Z tuteje přičiny buštej internataj zarjadowanej. Wonej skićitej šulerjam wot 5. hač do 12. lětnika serbske doma.

Cyle přirodnje serbsce žiwi być

Přebytk w internaće serbskeho gymnazija zmóžni šulerjam, serbšćinu w přirodnym rěčnym rumje jako wobchadnu rěč dožiwić a wotpowědnje jich indiwidualnemu rěčnemu niwowej cyle praktisce we wšědnym žiwjenju nałožować – zhromadnje z młodostnymi samsneje staroby pod přewodom serbskorěčnych kubłarjow. Při tym móža swoje rěčne zamóžnosće wudospołnić a tež swoju serbsku identitu dale wuwiwać.

Serbsce so rěči – wšudźe

Nimo zhromadneho zhotowjenja domjacych nadawkow rěči so potajkim tež při warjenju, hraću, sportowanju, paslenju atd. serbsce. Wosebitu hódnotu ma to za dźěći bjez serbskorěčneho swójbneho pozadka, dokelž móža woni wot maćernorěčnje serbskich wobydlerjow wuknyć.
W Rěčnym centrumje WITAJ přistajeny team kubłarjow organizuje přidatnje z wšelakimi partnerami wólnočasne projekty. Bjez internatneho městna njeby mnohim serbskim młodostnym ze zdalenišich wsow móžno było, poskitki zjawnych serbskich institucijow w měsće na wědomje brać, je zeznać a towaršnostne žiwjenje Serbow sobu postajować.

Internatne projekty – wuběr