Dobra nalada a čiłe žiwjenje knježitej w Chróšćanskej wjacezaměrowej hali „Jednota“, hdyž so tam dźěći a starši ke kóždolětnemu swójbnemu popołdnju zetkaja. Rěčny centrum WITAJ přeprošuje zhromadnje ze župu „Michał Hórnik“ na tute zarjadowanje.
Nimo ramikoweho programa dawa tójšto zajimaweho a zabawneho za dźěći: Woni móža so při sporće wopokazać, eksperimentować, so při rěčnych hrach wubědźować, sej mjezwočo namolować dać, dekoratiwne paslenki zhotowić abo so na rejowanskej dźěłarničce wobdźělić.
Rěčne zamóžnosće serbskich a serbsce wuknjacych dźěći su tež při kompjuterowych a druhich hrach Rěčneho centruma WITAJ abo při logopediskich zwučowanjach prašane. Sportowe a wotpinanske poskitki kaž tež pokiwy k strowemu zežiwjenju z receptami k wupruwowanju skulojća poskitk tutoho popołdnja.
Při wšitkich poskitkach za dźěći wot žłobika hač k zakładnej šuli njezabudu zarjadowarjo tež na staršich. Woni dóstanu wotmołwy wot ekspertow na swoje prašenja a móža so při kofeju a tykancu do rozmołwow zanurić.