Sobotu, 14. apryla 2018, wobdźěli so 24 šulerjow 3. lětnika na čitanskim wubědźowanju w Smolerjec kniharni. Dobyćerjej rěkataj Milan a Emely, wobaj staj šulerjej Serbskeje zakładneje šule „Jurij Chěžka“ Chrósćicy.
Dźěći čitachu mjez druhim z knihow Jurja Kocha, Jěwy-Marje Čornakec, Bena Budarja, Křesćana Krawca, Benedikta Dyrlicha, Lubiny Hajduk-Veljkovićoveje a Symana Šołty.
„Njebě lochko, najlěpšeju namakać, wšako běchu so wšitcy derje na wubědźowanje přihotowali“, rjekny Manuela Smolina, nawodnica jury.
