K spočatkej šulskeho lěta předleži nowa wučbnica „Naša maćeršćina 9/10“ kaž tež dźěłowy zešiwk „Zwučujemy a pisamy 9/10“ za serbske wyše šule. Z tutej wučbnicu je rjad maćeršćinow, kotryž je so po nowym wučbnym planje 2004/2009 nadźěłał, zakónčeny. Awtorojo noweje maćeršćiny su wučerki wyšeje šule Milenka Ertelowa, Kerstin Klingnerowa a Alena Dubawina, rěčespytnicy Serbskeho instituta dr. Anja Pohončowa a dr. Jana Šołćina, emeritowany profesor dr. dr. habil. Jürgen Schäfer, wědomostna sobudźěłaćerka RCW Manuela Smolina kaž tež lektorce Daniela Heelemanowa a Marja Hrjehorjowa. Sobudźěłaćerka RCW Simona Ćěslina je wučbnicu wěcywustojnje wuhotowała a z ilustracijemi wobohaćiłoj staj ju Andrea Reich a Andreas Fischer.

„Naša maćeršćina 9/10“ je rozrjadowana do pjeć tematiskich wobłukow „Čitać, rěčeć, pisać“, „Přemyslować wo rěči“, „Prawje pisać“, „Wo rěči Delnjoserbow so informować“ a „Kontrolować, so orientować“, kotrež su za lěpšu orientaciju we wšelakich barbach wuhotowane. Kóždy z tutych wobłukow ma zawodnu stronu, na kotrejž so šuler wo wobsahu a zaměrach jednotliweho tematiskeho wobłuka resp. kapitla informuje.

„Nazhonjenja w praktikumje“, „Kritisce nakupować“, „Zakonske postajenja čitać“, „Baseń analyzować a interpretować“, „Wužiwanje někotrych serbskich prepozicijow a wliw němčiny“, „Podobnosće a rozdźěle mjez hornjo- a delnjoserbšćinu“ su někotre z temow, kotrež so wobjednawaja. Šuler zwučuje na přikład požadanski list pisać a požadansku rozmołwu wjesć, spřistupnja sej wěcne teksty, kotrež jednaja wo wuskutkach alkohola abo wo přidawkach w kosmetiskich produktach, zwučuje diagramy wuhódnoćić, wukmanja so w argumentowanju na zakładźe temy „Němska – připućowanski kraj?!“, zwučuje analyzować a interpretować krótkopowědančka a basnje, přepruwuje a skrućuje swoju gramatisku a prawopisnu wědu a zwučuje so w tworjenju načasneje leksiki. W poslednim kapitlu „Kontrolować, so orientować“ namaka wón nimo zwučenych přehladow a gramatiskich tabulkow tež přehlad literarnych zapřijećow.

Dźěłowy zešiwk „Zwučujemy a pisamy 9/10“, wudospołnja maćeršćinu z dalšim zwučowanskim materialom.

  • Přidatny material za wučerja

Na CD do ruki wučerja su podate pokiwy k maćiznje, namjety za rozrisanje nadawkow a nahrawane je tójšto słuchanskich tekstow, předewšěm z wobłuka „Rěč Delnjoserbow“. Šuler słyši delnjoserbske słowa a teksty a móže je tak po wurjekowanju korektnje wospjetować. CD dóstanjeće bjezpłatnje w Rěčnym centrumje WITAJ (skazanske čisło L-9/281/17). Skazać móžeće ju z pomocu tutoho formulara.

mjeno (winowatostne polo)

e-mail (winowatostne polo)

nastupajo (winowatostne polo)

powěsć

Sym z wozjewjenjemi wo škiće datow přezjedny/-a.
Zběrane daty wužiwaja so bjezwuwzaćnje za internu potrjebu (za tu podaty zaměr). Daty so třećim njepřenjesu resp. dale njedadźa.