Za wučbu serbšćiny w 11. a 12. lětniku na Serbskim gymnaziju w Budyšinje je nastała nowa třidźělna wučbnica “Wobrazy serbšćiny 11/12, Literatura”. Awtorka a zestajerka 190 stronow wopřijaceje wučbnicy je wučerka serbšćiny na SGB Tereza Wićazowa.
Wobsahowje rozjimuje wučbnica literarne družiny, jednotliwe literarne žanry a jich přiznamjenja, analyzu, interpretaciju a literarne rozjimanje tekstow, jich natwar a strukturne elementy, formy figuroweje rěče, kak so figury charakterizuja a wjele dalšeho. Ke kóždemu žanrej su přikłady ze serbskeje literatury wubrane kaž tež sekundarna literatura a přidatne materialije podate. W přiwěšku su zjate literarne družiny a stilistiske srědki.
Jako dodawk k wučbnicy je na internetowej stronje sorbischlernen.de 80 přidatnych literarnych tekstow kaž tež wědomostnych pojednanjow a někotre strony wułušćenjow za wučerja wozjewjenych.
