Cyłkownje 220 šulerjow zakładnych šulow Ralbicy, Pančicy-Kukow, Chrósćicy, Worklecy, Budyšin, Radwor, Wojerecy, Kulow a Slepo je so na projektnych dnjach „Zetkanje ze Zejlerjom a Kocorom“ wobdźěliło. Zhromadny projekt župow Hornjeje Łužicy a Rěčneho centruma WITAJ w nošerstwje Domowiny wotmě so wot wutory, 5. pražnika, hač do pjatka, 8. pražnika, w domje a na zahrodźe Domowiny we Wojerecach. Projektne dny su wobstatk „Lěta Zejlerja a Kocora“, w kotrymž so na 150. posmjertniny basnika Handrija Zejlerja a 200. narodniny komponista Korle Awgusta Kocora spomina.
Kaž hižo po jutrach na samsnym městnje šulerjam wosmeho lětnika z cyłeje Hornjeje Łužicy poskićachu so nětko dźěćom štwórteho lětnika wšelake stacije. Na jednej zaběrachu so holcy a hólcy pod nawodom Sonje Hrjehorjoweje z fabulemi, na druhej bě tema rjemjesło, kotrež předstaji Brětnjanske rejowanske a drastowe towarstwo. Na třećej staciji Michaela Hrjehorjowa a Marlis Konjechtec wo žiwjenju Zejlerja a Kocora powědaštej a k tomu puzzle wo Zejlerju zestaještej. Na štwórtej staciji je Beata Nasticcyna spěw a hudźbu sposrědkowała. Na tute wašnje móžachu tež młódši šulerjo Zejlerja a Kocora derje zeznać. Na stacijach dźěłachu w měšanych skupinach, zo bychu so holcy a hólcy tež mjez sobu lěpje zeznajomili. Wutoru pobychu šulerjo z Pančic, Chrósćic a Budyšina na projekće, srjedu z Ralbic a Worklec, štwórtk dźěći z Radworja a Wojerec a pjatk z Kulowa a Slepoho.
