Štwórty lětnik Budyskeje serbskeje zakładneje šule je jedna z dobyćerskich rjadownjow wubědźowanja dźěćaceho časopisa Płomjo. Štwórtk, dnja 7. julija 2022, pobychu woni z redaktorom Płomjenja Pětrom Šołtu w Rownom, hdźež wobhladachu sej Njepilic dwór. Manfred Hermaš a jeho mandźelska móžeštaj holcam a hólcam wjele zajimaweho ze žiwjenja Hanza Njepile powědać a wjedźeštaj dźěći po burskej stwě a ratarskim muzeju. Po tym podachu so holcy a hólcy do susodneho Trjebina na Reinertec ranch k wobjedu a na zabawu. Tam jězdźachu z quadom a wubědźowachu so mjez druhim w třělenju z kłokom a prokom. Na dompuću w busu sej zhromadnje lóštnje zaspěwachu. Šulerki a šulerjo běchu ze swojim samo nawjerćanym widejom k 70. narodninam serbskeho dźěćaceho časopisa Płomjo cyłodnjowski wulět dobyli. Dalša dobyćerska rjadownja poda so w septembru zhromadnje z redaktorom časopisa na cyłodnjowski wulět.