W poslednich lětach je so w dźěćacym časopisu „Lutki“ tójšto nowych serbskich dźěćacych spěwow za předšulsku starobu wozjewiło. Na zhromadnym popołdnju póndźelu, 4. julija 2022 je dwanaće kubłarkow z tutych wuběr sydom spěwow pod nawodom Leńki Thomasoweje w Rěčnym centrumje WITAJ zeznało. Intensiwnje nazwučowali su sej spěw „Z woboru k wam jědźemy“, na kotryž njehodźi so jenož derje w kole rejować, ale samo gymnastiku přewjesć. Při spěwje „Młynske koła“ zasadźichu kubłarki rytmiske instrumenty a dachu z pomocu ćěła młynske koło wjerćeć. Nimo hižo wozjewjenych spěwow zeznachu kubłarki tohorunja dwaj spěwaj, kotrejž so hakle w přichodnych „Lutkach“ wozjewitej.