Lubi starši,
kaž kóžde lěto namakaće w štwórtym čisle lěta w Lutkach dlěšu stawiznu k wumolowanju a zasopowědanju. Tónkróć je wona z pjera znateje serbskeje awtorki Jěwy-Marje Čornakec z titlom „Kak je Krabat zmužitemu Jankej pomhał“: Jako so Krabat, kotryž je Čorny młyn wopušćił a nětko zaso w Jitku bydli, ze swojim psom Awgustom wuchodźuje, słyši hižo z daloko małeho Janka žałosćić. Što bě so stało? Jank měješe nadawk, husy pasć. Dokelž pak skerje wostudu paseše, so radšo hrajka a scyła njepytny, zo přińdźe zachribjetna liška po najrjeńšu husycu. Hač so husyca zaso nawróći a kak Krabat Jankej při tym pomha, zhoniće, hdyž čitaće stawiznu z Wašim dźěsćom!
Nimo stawiznje wozjewjamy w Lutkach 4-2021 delnjoserbski spěw „Ptači kwas“ wot Ingrid Nagloweje, na kotryž je Fabian Kaulfürst nowy hornjoserbski tekst spisał. A naposledk rozprawjamy wo jubilejnym zarjadowanju składnostnje 20-lětneho wobstaća Rěčneho centruma WITAJ, kotryž smy w septembru za šulerjow 4. lětnikow w Čornym Chołmcu přewjedli.
Lube kubłarki a lubi kubłarjo,
přidatnje smy za Was wudali zešiwk z dźiwadłowej hru „Kak je Krabat zmužitemu Jankej pomhał“, kotruž je tohorunja Jěwa-Marja Čornakec napisała. Hra hodźi so za 8 – 15 dźěći w pěstowarni, šuli abo horće zasadźeć.
