Awtomatiski přełožowar „sotra“ namakaće wotnětka pod krótšej swójskej adresu sotra.app. Nimo toho wobsahuje webstrona přełožowanskeho programa nětko dalše pomocne funkcije.

Pod prawym woknješkom móžeja wužiwarjo z pomocu Feedback-tłóčatka sotra-teamej swoje přispomnjenki a pokiwy přez e-mejlku pósłać.

Přidatnje móžeja woni nam z klikom na pokiw pod přełožkom dowolić, jich tekst a wotpowědny přełožk składować a dale wužiwać, zo bychmy tekstowy korpus rozšěrić a z tym wuslědki polěpšić móhli.

Za nas wobsahuja přełožki wužiwarjow wažne informacije. Sprěnja móžemy na jich zakładźe analyzować, kotre typiske zmylki „sotra“ tuchwilu hišće produkuje.

Zdruha widźimy, kotry wokabular w našim korpusu hišće pobrachuje, hačrunjež je wot wužiwarjow naprašowany. Z tym su tež gramatiske a časowe formy jednotliwych słowow měnjene. Na tute wašnje móžemy „sotru“ zaměrnje a wotpowědujo potrjebje wukmanić, tuž wjeselimy so na kóždy přinošk.

Jako wosebity serwis poskićimy wužiwarjam nětko tež integrowanu serbsku prawopisnu kontrolu, zo bychu swoje teksty hižo do přełožowanja sami kontrolować a wuporjedźić móhli. Kontrola hodźi so bjez dalšich krokow prosće zaswěćić z pomocu noweho tłóčatka nad lěwym woknom. Nimo toho je wotnětka tež móžno, webstronu we woči šonowacym „Dark Mode“ wužiwać.