W poslednim šulskim tydźenju běše zaso raz tak daloko: Mjeztym hižo k 9. razej wotmě so warjenski kurs Płomjenja w Budyskim Wjelbiku. Wosom hólcow a holcow mjez druhim z Hodźija, Worklec a Halštrowskeje hole smědźeše w hosćencowej kuchni z kucharjom Tomašom Lukašom při kachlach stać a warić. Dwě hodźinje su mali kucharjo pilnje dźěłali, zo bychu swojim hosćom k wječeri słódny meni serwěrować móhli.

Starši abo dźědojo a wowki smědźachu sej potom jako předjědź tomatowu solotej a po tym nudle ze spinatom a rybu zesłodźeć dać. Jako dessert sydaše hišće šokolodowy mousse z jahodami. Dźěći kucharjej Wjelbika pilnje pomhachu a ničo njepřismudźichu, tak zo móžemy so na bórzomny kucharski dorost w serbskich hosćencach nadźijeć.

  • k wobrazowej galeriji