Składnostnje 110. posmjertnych narodnin Jurja Brězana přewjedźe Domowina 9. a 10. junija 2026 w Budyšinje wosebitej projektowej dnjej. Na tutymaj wobdźěla so šulerki a šulerjo 7. lětnika z Kulowa, Radworja, Ralbic, Worklec a Budyšina. Na wšelakorych stacijach su za 170 wobdźělenych nadawki přihotowane, kiž so ze žiwjenjom a tworjenjom spisowaćela zaběraja. Partnerojo su Smolerjec kniharnja, Němsko-Serbske ludowe dźiwadło, Serbski institut, MDR Serbski rozhłós, dom Brězanec swójby na Alberta Schweitzerowej dróze (wuhotuje Rěčny centrum WITAJ), Serbski ludowy ansambl a w Serbskim domje projekt ZARI a Domowina. Studijo Lucija dźeń dokumentuje. Tak dyrbja skupiny na přikład Instagram-post přihotować a figuru brigadowanja na Serbskim domje wuslědźić.
W Brězanec domje w Budyšinje wita dr. Beata Brězanowa štyri skupiny. Wona informuje wo domje a žiwjenju spisowaćela. Potom maja so šulerki a šulerjo z prašenjemi kaž “Što zwjazuje tutón dom z Jurjom Brězanom?” abo “Na čim spóznajeće, zo sće w domje Jurja Brězana?” rozestajeć.
Regionalnej rěčnicy Katja Liznarjec a Katharina Jurkowa stej zhromadnje z wučerkomaj Milenku Ertlowej a Katku Bukowej wosebity projekt přihotowałoj. Podpěrała je jich projektowa managerka pola Domowiny Rejzka Krügerowa. Wučerce stej jednotliwe nadawki rozdźělnym rěčnym zamóžnosćam wobdźělnikow přiměriłoj.
Kontakt: Rejzka Krügerowa (tel: 03591 550-291, rejzka.kruegerowa@domowina.de)
