10 šulerkow a šulerjow 3. a 4. lětnika z Worklec, Budyšina a Radworja je so pjatk, 12. junija 2026, na čitanskim dyrdomdeju po Budyskich wěžach wobdźěliło.
Ze Serbskeho domu podachu so do stareho města a wobhladachu sej jeho kulisu, naličichu kopicu wěžow a nóžkowachu podłu měsćanskeje murje z jeje nahladnymi wěžami a wrotami. Při tym zhonichu zajimawostki ze srjedźowěka a wšelake funkcije wěžow. Wosebje zajimawe běchu za šulerjow Röhrscheidowa bašta, Wodowa a Mikławšowa wěža. Na nich předstajichu sej swoje najlubše serbske knihi a sej z nich předčitachu. Mały piknik w SLA, zabawne hry a kónčny kwis zarjadowanje skulojćichu.
