Składnostnje 20-lětneho jubileja załoženja Rěčneho centruma WITAJ rozprawjamy w najnowšim a wosebitym čisle Serbskeje šule wo aktualnej dźěławosći našich sobudźěłaćerjow a sobudźěłaćerkow w Budyšinje a w Choćebuzu.
Z barbnym wudaćom informujemy wo tučasnym wědomostnym slědźenju – wo konkretnych zaměrach a projektach, wo wužadanjach hladajo na tuchwilne a přichodne nadźěłanje serbskich wučbnicow a wučbnych srědkow w lektoraće za pedagogisku literaturu, wo časopisach Płomjo, Płomje, Lutki a Serbska šula, wo rěč spěchowacych projektach, wo kubłanju w serbskimaj internatomaj w Budyšinje a Choćebuzu a wo socialnym dźěle na serbskich šulach.
Nadrobnje předstajamy tež jednotliwe serbske wučbnicy a wučbne materialije, kiž smy za nowe šulske lěto 2021/2022 w našim lektoraće za Hornju, srjedźnu a Delnju Łužicu spřihotowali.
