Dobra nalada a wjeselo knježeše we wjacezaměrowej hali „Slawija“ w Radworju, jako zetkachu so tam dźěći a starši póstnisku njedźelu, 02.03.2025, k swójbnemu popołdnju.  Rěčny centrum WITAJ přeprosy zhromadnje z projektom ZARI na zarjadowanje. Nimo ramikoweho programa skićeše so dźěćom tójšto napjateho a wjesołeho: wone móžachu swoje sportowe kmanosće dopokazać, eksperimentować, so při šachu wubědźować, so šminkować dać abo dekoratiwne paslenki zhotowić. Rěčna zamóžnosć serbskich a serbšćinu wuknjacych dźěći bě tež při kompjuterowych a druhich hrach LND prašana.  Předčitanski róžk, pokiwy k strowemu zežiwjenju a clownowa šula skulojćichu poskitk.  Při wšěm tym so tež starši njezabychu.  Na swoje prašenja dóstachu wotmołwy wot ekspertow  a móžachu so při kofeju a tykancu z druhimi staršimi rozmołwjeć.