Hižo loni je so wobrazowa stawizna „Potajnstwo zmija“ z pjera Silwije Wjeńcyneje w Lutkach 4-2024 wozjewiła, kotruž je Martina Burghart-Vollhardt ilustrowała. W tutej powěda dźěd swojemu wnučkej Witkej wo zmiju, kotryž ludźom zbožo přinjese. Witko sej hłowu łama, kak by zmij wupadać móhł, što tajki zmij čini a kak by so počinał, zo by zmij tež k njemu přišoł.
Kubłanišća móža sej barbnje wuhotowanu stawiznu w zwučenym A4-formaće jako kolenowu knižku skazać. Smy pak material k prěnjemu razej tež jako kamishibai-stawiznu w formaće A3 wudali. Při tutym powědarskim dźiwadle předstaji kubłarka abo kubłar stawiznu z pomocu drjewjaneho ramika, do kotrehož jednotliwe wobrazy na krutym papjercu zasunje. Wjetši format zmóžnja, stawiznu cyłej skupinje přednjesć – nimale kaž w dźiwadle!
Kolenowu knižku kaž tež kamišibaj dóstanjeće za škitnu płaćiznu w Rěčnym centrumje WITAJ.
