Pod hesłom „Knihi su zastupny lisćik do raja fantazije“ zarjadowachmy lětsa k 19. razej čitanske wubědźowanje za šulerjow 3. lětnika. Najlěpši čitarjo šulskich wurisanjow přeprosychu so na kónčne wurisanje, kotrež wotmě so sobotu, 1. apryla 2023, po dwulětnej přestawce zaso w Smolerjec kniharni.

Wobdźěliło je so 16 dźěći ze zakładnych šulow we Wojerecach, Budyšinje, Radworju, Chrósćicach, Worklecach, Ralbicach a Pančicach. Pod nawodom Manuele Smolineje hódnoćeše fachowa jury wukony šulerjow w dwěmaj skupinomaj. W skupinje A1, w kotrejž wubědźowachu so maćernorěčni šulerjo, wudoby sej 1. městno Ludwig Jakubaš ze SZŠ „Michał Hórnik“ Worklecy a w skupinje A2 Lisbeth Pötzsch ze ZŠ „Handrij Zejler“ Wojerecy.

Wubědźowanje, kotrež ma dźěći k čitanju serbskeje dźěćaceje literatury pohnuć, přewjedźe so z podpěru Ludoweho nakładnistwa Domowina.