We wobłuku cyłoněmskeho předčitanskeho dnja, kotryž wotmě so pjatk, 15. nowembra 2024, koordinowaše Rěčny centrum WITAJ wjacore serbske čitanja we wšelakich kubłanišćach Hornjeje Łužicy. Něhdźe 150 dźěći w štyrjoch serbskich pěstowarnjach, dwěmaj WITAJ-skupinomaj a šěsć zakładnych šulach dožiwichu čitarki a čitarjow, kotřiž ze swojich najlubšich knihow předčitachu a dźěćom tak swoju zahoritosć za serbsku literaturu sposrědkowachu.