W rjedźe Płomjo-edicije je mjeztym hižo 4. knižka wušła. Stej to zaso dwě stawiznje, kotrejž je Měrćin Wjenk za dźěći wot 11 lět spisał.
W prěnjej stawiznje “Po strašnych pućach” poda so młody nazhonity wojowar Bježmin, sobustaw kralowskeje straže Rozwaša II., na namjeznu lodowu kupu, zo by tam lodoweho krala Mžrija přewinył a z tym swět a čłowjestwo wumóžił. Jeli so jako rjek wuspěšnje nawróći, smě sej slubjenu kralowsku dźowku za žonu wzać a dóstanje trón kaž tež cyłe kralestwo přewostajene.
Druha stawizna “Schowana hwězda” jedna wo młodym złóstniku, kotryž pyta za schowom w małym městačku na pěskowym planeće na kromje galaksije. Njetraje dołho a wón zašmjata so znowa do njeličomnych wušparanjow a tak přizwoli do nadawka, cuzu žonu z jastwa wuswobodźić. Při wuswobodźenju Biny z jastwa naškarataj chětro wulki chaos, tak zo dyrbitaj ćěkać. Tola jeju přesćěhowarjo tež w swětnišću dale za Ripsom a Binu honja …
Nowu ediciju Płomjenja dóstanjeće za 11,90 € w Smolerjec kniharni abo w internetowym wobchodźe LND.
