Serbska fachowa šula za socialnu pedagogiku w Powołanskim šulskim centrumje Budyšin ma tuchwilu ćeže, ze swójskimi wučerskimi kapacitami specifisku wučbu serbšćiny zaručić, w kotrejž so přichodni kubłarjo metodisce na swoje skutkowanje w serbsce dźěłacych dźěćacych dnjowych přebywanišćach přihotuja.
Na iniciatiwu tamnišeje wučerki Leńki Thomasoweje stej mjez druhim dr. Beata Brězanowa a Jadwiga Kaulfürstowa z Rěčneho centruma WITAJ nazymu jako hosćej na wjacorych terminach wuwučowałoj – a to serbskich šulerjow a serbske šulerki w regularnym wukubłanju runje tak kaž w powołanskopřewodźacym wukubłanju.
Tak rozestajachu so ze zakładami přiswojenja rěče z wida wuwićoweje psychologije, genetiki a rěčneje politiki kaž tež z prašenjemi identity. W dalšim dźěše wo imersiwne rěčne kubłanje: wo zasady, pozadki a slědźenja powšitkownje a eksplicitnišo wo serbskorěčne kubłanje w dźěćacych dnjowych přebywanišćach. Dalša pomoc při wuwučowanju je spočatk 2023 planowana.
