Srjedu, dnja 28. septembra 2022, witachmy w Serbskim domje w Budyšinje šulerki a šulerjow 3. a 4. lětnika ze zakładneju šulow Hućina a Bart, kotrež wuknu serbšćinu jako cuzu rěč. Tutón dźeń ma za nich wuznamjenjenje za to być, zo hižo wot 1. lětnika pilnje serbsce wuknu. Nimo toho móža na swjedźenju serbskeje rěče serbšćinu raz na hinaše wašnje hač w šulskej wučbje dožiwić. Wučerka Rejzka Delenkowa, kotraž wot noweho šulskeho lěta na šulomaj serbšćinu wuwučuje, je z šulerjemi hižo w prěnich tydźenjach tójšto nazwučowała. Tak prezentowachu holcy a hólcy k zahajenju swjedźenja wopisowani wo swójbje a rjadowni kaž tež znatu reju „Stup dale“. Na to rozdźělichu so do dweju skupinow, kóžda wopyta tři dźěłarnički. Tak zeznachu wšitcy „Serbsku reju“ z Alexandru Wagner a Janom Kozelnickim wot Serbskeho ludoweho ansambla, „Serbski spěw“ z přichodnej wučerku Christianu Bukec, „Płomjo“ z redaktorom Pětrom Šołtu a „Serbske powěsće“ z projektowej sobudźěłaćerku Rěčneho centruma WITAJ Weroniku Butendeichowej. Po tutym dopołdnju połnych dožiwjenjow posylnichu so ze słódnej kołbasku a z całtu, doniž so zaso na dompuć njepodachu.