Tutomu hesłu wěnuja so Lutki 2-2022. Wone poćahuje so na baseń ze samsnym titulom z pjera Bianki Wjeńcyneje. K basni je Kamjenska ilustratorka Martina Burghart-Vollhardt wulki lěćny wobraz namolowała. Tu móža so dźěći rozhladować a pytać: Kelko dźěći je na wobrazu widźeć? Što na zahrodomaj wšitko rosće? A štó sedźi tam w stanje? Wosebje předšulskim dźěćom budźe wjeselo, zwěrjatam na puću přez zahrodu pomhać. Awtorka Lubina Hajduk-Velkovićowa rozprawja wo swojej nowej dwurěčnej seriji „Dolina při rěče“ a za cyłu swójbu namakaće wosrjedź zešiwka paslensku předłohu za kóstku za blido z hrónčkami do jědźe, kotrež je Fabian Kaulfürst napisał.
W staršiskim dźělu čitaće wo angažemenće Serbskeho ewangelskeho towarstwa za młode swójby kaž tež wo nazhonjenjach serbskeje maćerje Katariny Čornakoweje z wuwićom dwurěčnosće jeje synow.
Kubłarki a kubłarjo namakaja w separatnym zešiwku namjety za zaběru z basnju “W lěću rady wonka smy” kaž tež wšelake ideje, kak so w pěstowarni ze stawiznu Jěwy-Marje Čornakec “Kak je wroblik Frido lětać nawuknył” zaběrać hodźi.
