Na próstwu Křesćansko-socialneho kubłanskeho skutka z. t. poskići wědomostna sobudźěłaćerka Rěčneho centruma WITAJ Jadwiga Kaulfürstowa 1. a 22. junija 2022 kubłarskimaj kolegijomaj Serbskeho dźěćaceho dnjoweho přebywanišća „Jan Radyserb-Wjela“ w Budyšinje a Dwurěčneho dźěćaceho dnjoweho přebywanišća Pančicy-Kukow w jich zarjadnišću dalekubłanje k temje „Imersiwne rěčne kubłanje w Serbach a strategije posrědkowanja a spěchowanja rěčnych znajomosćow dźěći“. Wona rozprawješe wo tym, kak bě so w 1990tych lětach metoda imersije w Serbach z mjenom „Witaj“ zakótwiła. Pokaza na zasady imersiwneho kubłanja dźěći a wubrane wuslědki wědomostnych studijow, kotrež su so z praksu posrědkowanja rěče bliže zaběrali. Při tym hraje rěčny input, kotryž so dźěćom poskića, klučowu rólu. Zhromadnje z referentku nadźěłachu a wuwědomichu sej kubłarki strategije, kotrež maja wulki wliw na wuspěch posrědkowanja a spěchowanja rěčnych znajomosćow dźěći.
Wopisane dalekubłanje poskići so tež kolegijam serbskich kubłanišćow w Njebjelčicach, Sulšecach a Radworju. Nimo toho je nazymu zarjadowanje za wšěch dalšich zajimowanych kubłarjow předwidźane.
