Hižo w lěće 2004 je wušoł spěwnik “Kikerahi, biło je tři” z CD, kotryž so po wjacorych dalšich nakładach tež dźensa hišće rady kupuje. Na próstwu serbskich kubłarkow a staršich je Leńka Thomasowa w nadawku Załožby za serbski lud a Rěčneho centruma WITAJ dalšich 33 titlow spěwnika za nowu cejdejku zestajiła. Na nahrawanjach sobu skutkowali su dźěći serbskich pěstowarnjow z Budyšina, Chrósćic, Malešec, Rownoho a Worklec kaž tež šulerjo SZŠ Budyšin a horta Pančicy-Kukow. Nowum je, zo su so přidali wšitke 33 playbackow prěnjeje a druheje cejdejki, kotrež su z pomocu Załožby za serbski lud nowe nastali. Dźěćom, wosebje předšulskim, ale tež staršim a kubłarkam předleži z tym spodobny a wšelako wužiwajomny zynkonošak.