Lube dźěći,
sće wědźeli, zo je Łužica połna zajimawych krajinow a městnow, kotrež słušeja samo k městnosćam UNESCO? Julka, Alenka a Witko podadźa so zhromadnje na kolesowarsku čaru „Serbske impresije“ a wotkryja sej při tym nic jenož Błóta, Mužakowski łuk, Mužakowski park a Hornjołužisku holu a haty, ale nazhonja tež, zo słušeja swjedźenje a nałožki Serbow k imaterielnemu herbstwu UNESCO. Někotre dźělčki Łužicy dóstanjeće z memohru „Herbstwo Łužicy“ do wašich dźěćacych stwow.
Starši móža sej čwak wědy wo herbstwje wulkotnje so měnjaceje Łužicy w nastawku Ellen Beuster načitać, kotraž je runočasnje tež awtorka dźěćaceje stawizny w aktualnym wudaću Lutkow. Zhromadnje z dalšej koleginu je wona zamołwita projektowa sobudźěłaćerka a kontaktna partnerka za UNESCO-projekt.
Kubłarkam a kubłarjam doporučamy w separatnej přiłoze „Spěwny měšk“, nowy material Rěčneho centruma WITAJ, kaž tež pokazku na předłohi za serbski portfolijo. Hdźe w času digitalizacije wšudźe serbsku hudźbu namakaće, předstajimy w zestawje „Serbska dźěćaca a zabawna hudźba w interneće“.
