Pod hesłom „Knihi su zastupny lisćik do raja fantazije“ zarjadowachmy lětsa k 18. razej čitanske wubědźowanje za šulerjow 3. lětnika. Najlěpši čitarjo šulskich wurisanjow přeprosychu so na kónčne wurisanje, kotrež wotmě so sobotu, 2. apryla 2022 w Serbskim muzeju w Budyšinje. Wobdźěliło je so 16 dźěći ze zakładnych šulow Wojerecy, Budyšin, Radwor, Chrósćicy, Worklecy, Ralbicy a Pančicy-Kukow. Pod nawodom Manuele Smolineje hódnoćeše fachowa jury wukony šulerjow w dwěmaj skupinomaj. W skupinje A1, w kotrejž wubědźowachu so maćernorěčni šulerjo, wudoby sej 1. městno Paul Čuška z Worklec a w skupinje A2 Helena Piwarcec z Wojerec.
Wubědźowanje, kotrež ma dźěći k čitanju serbskeje dźěćaceje literatury pohnuć, přewjedźe so z podpěru Ludoweho nakładnistwa Domowina a Serbskeho muzeja Budyšin.
