Lube dźěći, znajeće naručnu klanku Lotku, kotraž w Njebjelčanskej pěstowarni bydli? W interneće móžeće sej tójšto lóštnych filmow z njej a Sophiju wobhladać. Tež Witko je Lotku w interneće widźał a jara wćipny na nju był. Tuž je ju cyle jednorje w Njebjelčicach wopytał. Što je tam wšitko dožiwił, móžeće sej w fotowej stawiznje wobhladać. A Julka so jara wjeseli, zo je skónčnje lěćo! To móže tež zaso kupać jěć. Ale što ma so za to zdrasćić? Pomhajće Julce tola při wupytanju drasty!
Helena Rjedźina informuje staršich wo rěčnym spěchowanju dźěći a Janina Mikławškowa rozkładuje, kak so BOOKii-pisak wužiwa a kotre serbske knihi za njón předleža. Z praksy rozprawja Veronika Sćapanec, kotraž je w Budyskej pěstowarni „Pjerachowy kraj“ za projekt „Rěčne pěstowarnje: Dokelž je rěč kluč do swěta“ zamołwita.
We wudaću za kubłarki a kubłarjow dźe wo didaktiski material „klěšćowka“. Jako přikład słuži kopěrowanska předłoha k temje „nazwuki“ z wotpowědnymi rysowankami Lucije Škodźineje. Z pomocu drastowych kartkow „Zwoblěkaj Julku“ a nowymi kartkami móže so wobšěrna memo-hra z dźělemi ćěła a drastow zhotowić.
