Wušoł je nowy nakład maćeršćiny za 5. lětnik. W předležacej wučbnicy su nětko tež poslednje změny wučbneho plana wobkedźbowane. Tež gramatiski wobłuk je so dokładnje předźěłał a nowej šulskej gramatice „Gramatika – Tabulki a přehlady za wučbu serbšćiny“ přiměrił.
Nimo toho smy na wotpowědnych městnach wupokazali wotkazy na digitalne poskitki kaž na přikład na digitalny wuknjenski portal Krok po kroku. Tutón digitalny wučbny srědk poskićuje šulerjam 5. a 6. lětnika přidatne prawopisne a gramatiske nadawki a zwučowanja na hrajne wašnje a w lóštnej formje. Tež we wobłuku „Dźěło ze słownikom“ su přidatne nadawki sformulowane, zo bychu šulerjo z digitalnym słownikom pod www.soblex.de zwučowali, sej tutón medij spřistupnili a jón jako wšědnu pomoc w mnohich žiwjenskich wobłukach wužiwać wědźeli. Za šulerjow, kotřiž serbšćinu hišće na maćernorěčnym niwowje njewobknježa, smy pola jednotliwych tekstow přełožki mjenje znatych zapřijećow dodali. Do poslednjeho kapitla stej so dodałoj tabulka deklinacije pluraletantumow kaž tež přehlad časowych formow.
Přejemy wšitkim wučerkam a wučerjam serbšćiny lochku wučbu z pomocu noweje maćerje, šulerjam pak wjeselo nad wuknjenjom a kopicu noweje wědy wo našej lubowanej maćeršćinje.
Wučbnicu dóstanjeće za 17,90 € w Smolerjec kniharni w Budyšinje abo přez online-wobchod Ludoweho nakładnistwa Domowina.
