„Warimy z Tomašom“- pod tutym hesłom je póndźelu, 8. apryla 2019, wosom šulerjow z kucharjom Tomašom Lukašom w Budyskim hosćencu Wjelbik w horncach a pónojach měšało. Běchu to dobyćerjo wubědźowanja Płomjenja.  W běhu popołdnja nawarichu mali kucharjo běrnjacu poliwku a pjelnjenu kokošacu hrudź a napječechu tež šokolodźane tykančki. Hromadźe ze swojimi přiwuznymi dachu sej dźěći meni potom zesłodźeć.

Hižo wot 2012 sem warja čitarjo Płomjenja jónu wob lěto zhromadnje z kucharjom Tomašom Lukašom, kotryž je zdobom tež awtor receptow w dźěćacym časopisu.