Přiručka za kubłarki a kubłarjow je w nowym formaće a trochu rozšěrjenym nakładźe wušła. Wona měri so na wosoby, kotrež skutkuja na polu serbskorěčneho kubłanja w dźěćacych dnjowych přebywanišćach a kotřiž chcedźa swoje serbskorěčne kmanosće aktiwizować abo wudospołnić. Brošura chce być pomocny a dźěłowy srědk za wšitkich, kotřiž dźěći na dwu- a wjacorěčne šulske kubłanje přihotuja. W prěnim dźělu přiručki namakamy w němsko-serbskim słowničku wuběr słowow a jich formow alfabetisce rjadowane z rěčneho wobłuka pěstowarskeho dźěsća. W druhim dźělu wopisuje so wosom temow ze wšědneho dnja dźěsća z typiskimi słownymi skupinami, sadami a rěčnymi wobrotami. Wudawaćel je Domowina – Zwjazk Łužiskich Serbow z. t., Rěčny centrum WITAJ. Wobjim brošury wučinja 320 stronow.