Serbske pěstowarnje a Witaj-skupiny smědźa so přez nowy material wjeselić. Smy kamishibai-stawiznu wo „Pilnych, sylnych mrowičkach“ wudali, kotruž je Goethowy institut hižo w lěće 2008 wuwił. W stawiznje wuchodźuje so zajac Sandro w lěsu a zeznaje žiwjenje mrowičkow. Wobrazy na krutej papjerje w formaće A3 prezentuja so w drjewjanym kašćiku jako powědarske dźiwadło. Dźěći móža prědku wobrazam slědować, mjeztym zo ma kubłarka abo kubłar zady tekst w němskej, hornjo- abo delnjoserbskej wersiji před sobu. Při tym ma ruce swobodnej za gestiku a činohru.
Didaktiski material móža sej wšitcy, kotřiž serbsku rěč posrědkuja, bjezpłatnje w Rěčnym centrumje WITAJ wotewzać.
