W jutrownych prózdninach přewjedźechmy 6. raz ferialny rěčny kurs za serbske dźěći, kotrež wotrostu zwonka Łužicy. Pod nawodom studentow wučerstwa Sofije Brězanec, Jonasa Pjetaša, Jakuba Škody a Tadeja Donata nawukny 25 šulerjow 1. do 6. lětnika w dopołdnišich hodźinach serbski alfabet. Nimo toho zeznajomichu so z nałožkami a bajowymi figurami, zwučowachu serbsce pisać a čitać, spěwachu, rejowachu a paslachu.
Na popołdnjach dožiwichu wšelake serbskorěčne poskitki. Tak wotkrychu sej zajimawostki města Budyšina a jeho wěžow, rejowachu w Serbskim ludowym ansamblu a wopytachu jutrownu wustajeńcu w Serbskim muzeju, Smolerjec kniharnju a Serbski rozhłós.
Wobdźělnicy kursa přińdźechu mj. dr. z Lipska, Berlina, Dortmunda, Drježdźan a Wjelećina.
