Sobotu, 27.09.2025, smy mjeztym 8. serbsku comicowu dźěłarničku přewjedli, tónraz na Radworskim dwórnišću inkluzije. Znaty ilustrator Stefan Hanuš je dohromady 19 šulerjow 3. do 6. lětnika z Budyšina, Radworja, Pozdec, Worklec, Pěskec, Pančic-Kukowa, Prawoćic a Budestec do potajnstwa rysowanja comicsow zawjedł. Tež šulerka 2plus-koncepta z Wojerowskeje zakładneje šule „Handrij Zejler“ je so wobdźěliła. Pod nawodom ilustratora, kotryž je mjez druhim comicowej figurje Feliksa a Floriana do žiwjenja zwołał, su so šulerjo w rysowanju figurow, pohibow, gestiki a mimiki sami wuspytali.