Hač přinjese ličba 13 njezbožo? Při warjenju na zbožo nic. Na póndźeli w poslednim šulskim tydźenju běchu mjenujcy wosom hólcow a holcow do Wjelbika přijěli, zo bychu so na mjeztym hižo 13. warjenskim kursu Płomjenja wobdźělili. Tež lětsa smědźachu dźěći zaso z Tomašom Lukašom hromadźe słódny meni přihotować, kotryž potom pozdźišo hordźe swojim hosćom k wječeri serwěrowachu. Tónraz su sej někotři samo swoju wučerku přeprosyli. Do toho pak dyrbjachu pilnje běrny bělić, zeleninu přihotować, ćěsto dźěłać abo mjaso klepać, zo by so tež wšitko derje radźiło. Na zbožo tomu tež tak běše, tak zo smědźachu sej wšitcy zhromadnje zymnu kórkowu poliwku, cordon bleu z pomfritkami a brokolijom a jako dessert wišnjowy ragout z lodom zesłodźeć dać.