Bórze su jutry! We Łužicy znajemy tójšto jutrownych nałožkow. W Delnjej a srjedźnej Łužicy chodźachu jutrońčku něhdy młode žony hišće do schadźenja słónca mjelčo k žórlešku abo k rěčce, zo bychu sej tam jutrownu wodu čerpali. Tež Witko a Julka tutón nałožk w najnowšich „Lutkach“ zeznaja. Dale čakaja na was, lube dźěći, zwučowanje, hrónčka „Ducy po jutrownu wodu“ kaž tež spěwčk wo li-la-lóštnym jěžiku.
W dźělu za staršich čitaće wo nazhonjenjach maćerje Witaj-dźěći z Čorneho Chołmca a interview ze serbskej dźěćacej lěkarku dr. med. Jadwigu Wałdźinej, kotraž ma swójsku praksu w Radworju.
Kubłarki a kubłarjo dóstanu w separatnym zešiwku přehlad wo na nich wusměrjenych poskitkach Rěčneho centruma WITAJ. A za nadźijomnje bórzomne ćopłe nalětnje (a lětne) dny namakaja so wódne hry ze serbskimi powěsćowymi figurami. Ale kedźbu, njedajće so wot wódneho muža womačeć!
