Za šulerjow zakładnych šulow je dalši dźěl w rjedźe Čitanskich sowow wušoł. Nowy material je wuwity za spěchowanje čitanskeje kompetency w předmjeće serbšćina. Material wobsahuje zaso 9 čitanskich hrow, kotrež hodźa so z cyłej rjadownju hromadźe ‘hrać’. Kóžda hra wobsahuje 24 kartkow k rozdźělnym temam abo ćežišćam: Werby, Nadzapřijeća a adjektiwy, Štomy a płody štomow, Prepozicije, Jěž, Woda a wjedro, Zwěrjata, Swójby zwěrjatow a Rekordy.
Čitanska hra je koncipowana jako čitanski rjećaz, pola kotrehož maja dźěći w skupinje sej mjez sobu připosłuchać, předčitać a prawje reagować. Dźěćo ze startowej kartku započina. Kóžda kartka so předčita. Ručež dźěćo w předčitanym swójsku kartku spóznaje, wone wotpowědnje reaguje a předčita potom tekst swojeje kartki. Tak dźe to dale, doniž njejsu so wšitke kartki předčitali a njej kónc docpěty.
Nowy material Čitanska sowa, ze skazanskim čisłom 0/212/26-1A, je za 16,90 € w Smolerjec kniharni w Budyšinje na předań. Móžeće material tež w Ludowym nakładnistwje Domowina skazać.
