Pod hesłom „Knihi su zastupny lisćik do raja fantazije“ zarjadowachmy lětsa 22. raz čitanske wubědźowanje za šulerjow 3. lětnika. Najlěpšich čitarjow šulskich wurisanjow přeprosychmy na kónčne wurisanje, kotrež wotmě so sobotu, 28. měrca 2026, w Smolerjec kniharni w Budyšinje. Wobdźěliło je so 17 dźěći ze zakładnych šulow Wojerecy, Budyšin, Radwor, Chrósćicy, Worklecy, Ralbicy a Pančicy-Kukow.
Pod nawodom dr. Beaty Brězanoweje hódnoćeše fachowa jury, w kotrejž skutkowachu wučerki Jadwiga Ošikowa (SZŠ Worklecy), Bianka Klugowa (SZŠ Ralbicy), Edit Mjechelina (ZŠ Kulow) a lektorka LND Janina Mikławškowa, wukony šulerjow.
Najlěpši čitar w maćernorěčnej skupinje A1 bě Tadej Brězan (SZŠ Worklecy). W skupinje A2 bě Elisa Rjenčec (SZŠ Radwor) najlěpša čitarka.
Wubědźowanje, kotrež ma dźěći k čitanju serbskeje dźěćaceje literatury pohnuć, přewjedźemy w kooperaciji z Ludowym nakładnistwom Domowina.
