Na dźěći čaka we wudaću Lutkow 4-2024 wosebitosć: prěni raz su cyłostronske wobrazy stawizny kompletnje pisane wuhotowane! Tutón króć Witko přebywa kónc tydźenja w Błótach pola wowki a dźěda. Dźěd powěda přeco rjane stawizny kaž na přikład wo zmiju, kotryž ludźom zbožo přinjese. Nětko je Witko wězo wćipny: Kak wupada tajki zmij? Što wón dokładnje čini? A čehodla lěta zmij jenož k susodej? Hač zmij tola tež hišće k Witkej namaka, čitaće w stawiznje „Potajnstwo zmija na jědnaće wobrazach, kotruž je Silwija Wjeńcyna napisała a Martina Burghart-Vollhardt krasnje ilustrowała. Wjace wo powěsćach a zmijach zhoniće w krótkim wěcnym přinošku. So wě, zo přileći tež k wam domoj zmij zboža! Z paslenskim nawodom móžeće sej cyle spěšnje sami tajkeho zmija za dźěćacu jstwu spaslić. A naposledk namakaće rjany adwentny spěw z pjera Marije R.-Šołćineje.
Tež 2024 bě čmjeła Hana zaso w pěstowarnjach po puću. Wo wopyće w Malešanskej pěstowarni rozprawja tamniša wjednica Helena Kralec. Awtor a režiser dźiwadłoweje hry z titulom „Čmjeła Hana wočakuje wopyt“ je Měrko Brankačk.