Znajeće tajke dny, na kotrychž zda so ći wšitko nimokuleć? Runje tajki dźeń dožiwi Witko w stawiznje aktualneho wudaća Lutkow. Na zbožo pak přińdźe jeho saznik wopytać a njetraje dołho, to so hižo zaso słónčko směje! Dale zhoniće, čehodla saznik poprawom tak rěka, kaž wón rěka a kak tomu, zo ludźom zbožo přinjese. Basni jednatej wo sazniku a posměwku, kotryž tohorunja zbožu polěkuje. Naposledk móžeće sej spěwčk wo sazniku zaspěwać.
W staršiskim dźělu rozprawja rěčna motiwatorka ZARI we Wojerowskej župje Marija Šołćic wo kursu serbšćiny za staršich we Witaj-pěstowarni „Pumpot“ w Němcach. A Diana Pawlikowa předstaja jako projektowa managerka cyłkowny projekt ZARI – syć za serbsku regionalnu identitu. Wjeselić smědźa so dźěći přez nowu serbsku dźěćacu knihu „Mała wjera“ (original: „Die kleine Hexe“) z pjera Otfrieda Preusslera. Do hornjoserbšćiny přełožiła je ju Lubina Hajduk-Veljkovićowa a wona je ju premjernje w Budyskej serbskej pěstowarni předstajiła.
Za kubłarki a kubłarjow smy přihotowali sceniski dialog z naručnej klanku za (młódše) serbsce wuknjace dźěći a dalše metodiske doporučenja k temje ličby, k lěpšemu zeznaću a porstowu hru „Porsty nas witaja“. Doporučić chcemy nowy 166 stronow wopřijacy rjadowak „Dźemy do lěsa“, kotryž móžeće sej za 10 € w Rěčnym centrumje WITAJ skazać.
