Wušła je nowa dźěłowa kniha Wězo serbsce! Serbšćina za dorosćenych A1, kotraž je wusměrjena na započatkarjow a ma wuknjacych při nawuknjenju hornjoserbskeje rěče podpěrać.
Cilowa skupina su dorosćeni, kotřiž nimaja słowjanske korjenje resp. njejsu linguisća. Hłownje wusměrja so dźěłowa kniha na tajkich, kotřiž nimo powołanja a wjele dalšich wšědnych zawjazkow připódla serbšćinu wuknu.
Material ma 5 lekcijow: prěnja lekcija skići wuknjacym zawod do fonetiki. Dalše tři lekcije posrědkuja prěnje wokable a wobroty a skića dohlad do zakładow gramatiki. Lekcije su tematisce rozrjadowane a poćahuja so na situacije wšědneho dnja. Wuknjacy njewuknu jenož spisownu serbšćinu, ale dóstanu tež prěni přistup k wobchadnej serbšćinje. Pjata lekcija je modelowy test, kotryž je jako pruwowanje koncipowany.
Dźěłowu knihu Wězo serbsce! Serbšćina za dorosćenych A1, skazanske čisło 0/201/24-1B, móžeće za 16,90 € w Smolerjec kniharni abo w online-wobchodźe Ludoweho nakładnistwa Domowina kupić.
