Za šulerjow 5./6. lětnika na wyšich šulach předleži nowa serbska wučbnica za nabožinu „Žiwjenje wobohaćić 1”. Wučbnica je prěnja kniha noweho rjadu za katolsku nabožinu a je licencne wudaće rjadu “Leben gestalten” nakładnistwa Klett.
Nowa kniha wobsahuje 10 kapitlow k sćěhowacym temam: 1 Zhromadnje žiwi być a wuknyć: z dobrej zhromadnosću so stać, 2 Wosrjedź žiwjenja – Boha pytać a nazhonić, 3 Z knihu něšto nowe widźeć – biblija, 4 „Kak lubo je mi twój wukaz ” – žiwjenje z toru, 5 Što je to do čłowjeka? Žid Jězus z Nacareta, 6 Pozastać a spominać: swjedźenje swjećić, 7 Pawoł – wot přesćěharja k přesćěhanemu, 8 Islam – Bohu so podać, 9 Cyrkej – zhromadźenstwo po puću, 10 Słowo je wjace hač słowo. W přiwěšku nadeńdu šulerjo pod hesłom ‘metody’ dokładne wujasnjenja wšitkich metodow, kotrež so w knize wobjednaja. Sćěhuje ‘glosar’ z najwažnišimi hesłami, kotrež su hišće raz jako zjeće rozłožowane. Z wotrězkom ‘Pokiwy k rozrisanju nadawkow’ so wučbnica kónči.
Z wučbnicu předleži nowy, moderny material za šulerjow a wučerjow. „Žiwjenje wobohaćić 1“, skazanske čisło 5/124/24-1A, je za 23,95 € w Smolerjec kniharni w Budyšinje na předań. Dóstanjeće wučbnicu pak tež přez online-wobchod Ludoweho nakładnistwa Domowina.
