Za šulerjow 2. lětnika je wušła nowa wučbnica serbšćiny, Naša maćeršćina 2. Wučbnica ma nadawk, šulerjow rěčnje zdźěłować a zdobom kubłać. Wona rozrjaduje so do 9 kapitlow z temami z bjezposrědneho wobswěta dźěći. Při wuwiwanju wučbnicy su so wšitke wuknjenske wobłuki wučbneho plana wobkedźbowali: rěčenje, pisanje, čitanje, zhladowanje na rěč a tež přirunowanje rěčow su přeco na wěsty kontekst wjazane. Dźěći nawuknu, samostatnje zwiski spóznać a nałožować a myslenske procesy splesć.
„Naša maćeršćina 2“, skazanske čisło 2/121/23-1A, je za 16,90 € w Smolerjec kniharni w Budyšinje na předań. Dóstanjeće zešiwk pak tež přez online-wobchod Ludoweho nakładnistwa Domowina.
