We wobłuku małeje čitanskeje turneje dnja 28.měrca 2023 je awtorka Andreja Chěžcyna nowu, njedawno w rjedźe „Płomjo edicija“ wušłu knihu „Maks a Ambrož“ dźěćom 4. do 7. lětnika w Chróšćanskej a Pančičanskej zakładnej šuli kaž tež na Radworskej wyšej šuli předstajiła. Lóštnym powědančkam wo psu Maksu a jeho towaršu, božim słónčku Ambrožu, šulerki a šulerjo rady připosłuchachu. W Pančicach-Kukowje staj šulerjej samo spontanje zhromadnje z awtorku stawizničku přednjesłoj. Wjacori šulerjo wužichu składnosć, sej knihu hnydom kupić a wot Andreje Chěžcyneje signować dać. Kniha je w Smolerjec kniharni abo w internetowym wobchodźe nakładnistwa na předań.