Wučbny material za čitanje w zakładnej šuli ma so dospołnje předźěłać. Za to móžeše Rěčny centrum WITAJ Štefana Pašku a Józefa Donata jako awtorow zdobyć. Na zetkanju w RCW staj koleginam a kolegam serbskich zakładnych šulow swoju koncepciju noweho čitanskeho materiala za wučbu serbšćiny předstajiłoj. Planuje so nowa “Čitanska křinja”, w kotrejž budu po wšelakich temach wučbneho plana zakładneje šule tematiske čitanske zešiwki rjadowane. Z nimi hodźi so samostatne čitanje po zamóžnosćach a zajimach dźěći zaměrnišo spěchować. Přidatnje pak nadźěła so tež zakładna čitanka, w kotrejž so na jednotliwe tematiske zešiwki pokaza. Mjez přitomnymi so problemy a lěpšiny čitanskeje křinje žiwje diskutowachu, přiwšěm so nowa forma materiala witaše.

Za šulske lěto 2023/2024 ma so nowy rjad ze zešiwkami na temy mjezsobne žiwjenje, zwěrjata a ptački a ze čitanskimi šćežkami zahajić. Wučerki a wučerjo su namołwjeni a pozbudźeni, awtorow ze swójskimi idejemi a wudźěłkami podpěrać a material dodawać. Wšako woni najlěpje wědźa, što dźěći zajimuje a na kotre wašnje hodźi so wěda z wjeselom posrědkować.

Dołhož so na rěčnej křinje dźěła, předležace Čitanki wězo dale płaća.