Za wuknjacych 3. do 6. lětnika předleži nětko sylnje wobdźěłana dźěłarnička „Ptački našeje domizny“. Dźěłarnička hodźi so ze słuchopisakom BOOKii wužiwać. Tak hodźi so jednotliwym ptačim portretam fifolenje ptačkow wotwołać a we wšelakich hrach tež wotpowědnje přirjadować. Přidatnje su zajimawostki dokoławokoło jednotliwych ptačkow jako „Ptače stawiznički“ wot něhdyšeho rozhłosownika Marka Grojlicha słyšeć. Tež tak mjenowany ptači časnik, kiž pokazuje hdy kotry ptačk započnje fifolić, je nětko do dźěłarnički zapřijaty. Za so kóžde lěto wotměwacej a dźeń a woblubowanišej akciji ličenja zahrodnych a zymskich ptačkow Němskeho přirodoškitneho zwjazka NABU e.V. namakaja zajimcy w dźěłarničce nětko wotpowědne předłohi.
Jako rěčnikaj skutkujetaj rozhłosownikaj Blanka Funcyna a Lucian Kubica. Awdija buchu pola Simank-Film GbR w Budyšinje produkowane.
Dźěłarničku dóstanjeće za 11,90 € w Smolerjec kniharni abo přez online-shop Ludoweho nakładnistwa Domowina.
