Lětsa wobsteji Rěčny centrum WITAJ 20 lět. Ze swojimi hornjoserbskimi a delnjoserbskimi poskitkami měrimy so na najmjeńšich w dźěćacych dnjowych přebywanišćach, na šulerjow w šulach a zwonka nich a na dorosćenych. Nadrobnišo wo šěrokim polu skutkowanja RCW zhoniće w lětušim třećim wudaću „Serbskeje šule“.

Składnostnje našeho jubileja přewjedźemy srjedu a štwórtk, 29. a 30.09.2021, za serbšćinarjow 4. lětnika Hornjeje, srjedźneje a Delnjeje Łužicy projektowej dnjej w Čornym Chołmcu. Wjeselimy so jara, zo slěduja našemu přeprošenju wučerki a wučerjo z dohromady 180 šulerkami a šulerjemi z Barta, Bošec, Bórkow, Budyšina, Hućiny, Kulowa, Noweje Wsy, Radworja, Pančic-Kukowa, ze Slepoho, z Wojerec, Worklec a ze Žylowa. Zhromadnje z koleginami Krabatoweho młyna, regionalnej rěčnicu a projektowej sobudźěłaćerku Domowiny smy wšelake dźěłarnički spřihotowali.

Šulerki a šulerjo

• zhonja wo wandrowskich,
• wuspytaja so w sceniskim hraću,
• zeznaja dožiwjensku šćežku po Měrćinje Nowaku-Njechorńskim,
• dožiwja přeměnjenja z pomocu čiń-sobu-stawizny a
• nawuknu nazornje w Krabatowym młynje a w nowej małej pjekarni, kak ze zorna chlěb nastawa.

Nimo powučacych dźěłarničkow wočakujetej wobdźělnikow zabawa a wjeselo.

Poprawom běše za 29. september projektowy dźeń ze šulerjemi planowany a 30. septembra chcychmy sej hosći na swjatočne fachowe zarjadowanje do Čorneho Chołmca přeprosyć. Hladajo pak na njewěstosće w zwisku z korona-pandemiju smy lětsa w meji rozsudźili, so swjatočneho fachoweho zarjadowanja wzdać a město toho dwaj projektowej dnjej přewjesć. Wšako dyrbjachu šulerki a šulerjo w zašłym lěće wjele móžnosćow zhromadnosće a wosebiteho dožiwjenja parować. A tohodla měli šulerki a šulerjo nětko w srjedźišću našeho jubileja stać. W přihoće smy projektowe materialije do hornjo- a delnjoserbšćiny přełožili. Tak podpěramy kubłanske skutkowanje w Krabatowym młynje a nadźijamy so, zo sej serbšćinarjo a serbšćinarki Krabatowy młyn w Čornym Chołmcu dźeń a bóle jako wosebite zhromadne kubłanišćo wotkryja.